ໃນຕອນເຊົ້າ ຂອງວັນທີ 15 ຕຸລາ 2021, ທີ່ ພະຣາຊະວັງອົດສະໂລ, ພະນະທ່ານ ບຸນລຽບ ຮຸ່ງວົງສອນ, ໄດ້ເຂົ້າຍື່ນສານຕາຕັ້ງຕໍ່ ອົງສົມເດັດ Harald V, ພະເຈົ້າຊີວິດ ແຫ່ງຣາຊະອານາຈັກນອກແວ

ໃນຕອນເຊົ້າ ຂອງວັນທີ 16 ມິຖຸນາ 2020, ທີ່ ກະຊວງການຕ່າງປະເທດ ແຫ່ງ ຣາຊະອານາຈັກ ເດນມາກ, ພະນະທ່ານ ບຸນລຽບ ຮຸ່ງວົງສອນ, ໄດ້ເຂົ້າຍື່ນສານຕາຕັ້ງສະບັບສຳເນົາ ໃຫ້ແກ່ ທ່ານທູດ Michael Zilmer-Johns, ຫົວໜ້າກົມພິທີການທູດ, ກະຊວງການຕ່າງປະເທດ ແຫ່ງ ຣາຊະອານາຈັກ ເດນມາກ

ໃນຕອນເຊົ້າຂອງວັນທີ 16 ມັງກອນ 2020, ທີ່ພະຣາຊະວັງເຈົ້າຊີວິດ, ນະຄອນຫລວງສະຕ໋ອກໂຮມ, ທ່ານ ບຸນລຽບ ຮຸ່ງວົງສອນ ໄດ້ຍື່ນສານຕາຕັ້ງຕໍ່ ເຈົ້າຊີວິດ Carl XVI Gustaf ແຫ່ງ ຣາຊະອານາຈັກ ຊູແອັດ ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ປະຈຳ ຣາຊະອານາຈັກ ຊູແອັດ.

ໃນໂອກາດດັ່ງກ່າວ, ເຈົ້າຊີວິດ Carl XVI Gustaf, ໄດ້ສະແດງຄວາມຍິນດີ ແລະ ຊົມເຊີຍ ທ່ານ ບຸນລຽບ ຮຸ່ງວົງສອນ ໃນການມາດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຈຳ ຣາຊະອານາຈັກ ຊູແອັດ ແລະ ໄດ້ອວຍພອນໃຫ້ ທ່ານເອກອັກຄະລັດຖະທູດ ປະຕິບັດໜ້າທີ່ການທູດດ້ວຍຜົນສຳເລັດ ເພື່ອສົ່ງເສີມການພົວພັນຮ່ວມມື ຂອງສອງປະເທດ ລາວ-ຊູແອັດ ໃຫ້ຂະຫຍາຍຕົວຂື້ນໄປເລື້ອຍໆ. ເຈົ້າຊີວິດ Carl XVI Gustaf, ໄດ້ໃຫ້ຄວາມສໍາຄັນຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງປະເທດ ແລະ ໄດ້ມີຄວາມສົນໃຈການປົກປັກຮັກສາປ່າໃມ້ ແລະ ສະພາບແວດລ້ອມ.

ທ່ານ ບຸນລຽບ ຮຸ່ງວົງສອນ ໄດ້ສະແດງຄວາມຂອບໃຈຢ່າງຈິງໃຈຕໍ່ການຕ້ອນຮັບອັນອົບອຸ່ນ ແລະ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນພ້ອມດ້ວຍພອນໄຊອັນປະເສີດ ຂອງພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ເຖິງ ເຈົ້າຊີວິດ Carl XVI Gustaf. ເຈົ້າຊີວິດ Carl XVI Gustaf, ໄດ້ສະແດງຄວາມຂອບໃຈ ແລະ ໄດ້ສົ່ງຄວາມຢື້ຢາມຖາມຂ່າວ ແລະ ອວຍພອນໄຊອັນປະເສີດ ເຖິງທ່ານປະທານປະເທດ ແຫ່ງ ສປປ ລາວ ເຊັ່ນດຽວກັນ. ໃນໂອກາດດຽວກັນນີ້, ທ່ານເອກອັກຄະລັດຖະທູດ ກໍໄດ້ຕາງໜ້າລັດຖະບານ ແລະ ປະຊາຊົນລາວ ສະແດງຄວາມຂອບໃຈ ແລະ ຮູ້ບຸນຄຸນຕໍ່ລັດຖະບານ ແລະ ປະຊາຊົນ ຊູແອັດ ທີ່ໄດ້ໃຫ້ການສະໜັບສະໜູນຊ່ວຍເຫຼືອຕໍ່ ສປປ ລາວໃນໄລຍະຜ່ານມາ, ເຊິ່ງເປັນການປະກອບສ່ວນເຂົ້າໃນການສ້າງສາ ແລະ ພັດທະນາເສດຖະກິດ-ສັງຄົມ ຂອງ ລາວ ໃຫ້ຂະຫຍາຍຕົວເປັນກ້າວໆມາ. 

ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກ ຊູແອດ ໄດ້ສ້າງຕັ້ງສາຍພົວພັນການທູດຮ່ວມກັນ ແຕ່ວັນທີ 10 ຕຸລາ 1964 ແລະ ໄດ້ມີການພົວພັນຊ່ວຍເຫຼືອເຊິ່ງກັນ ແລະ ກັນ ດ້ວຍດີຕະຫຼອດມາ.