ນັບແຕ່ກອງປະຊຸມໃຫຍ່ອົງຄະນະພັກກະຊວງການຕ່າງປະເທດຄັ້ງທີ II ກໍຄືຕະຫລອດໄລຍະ 5 ປີຜ່ານໄປຈົນເຖີງປັດຈຸບັນ ເຖີງວ່າຈະເປັນເວລາທີ່ຍາວ ຫລື ສັ້ນ ແຕ່ນັ້ນ ກໍເປັນສິ່ງພິສູດເຖີງຜົນສຳເລັດ ຢ່າງສະຫງ່າງາມ ໃນການຜັນຂະຫຍາຍ ມະຕິຂອງກອງປະຊຸມໃຫຍ່ອົງຄະນະພັກກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກຄັ້ງທີ IIພາຍໃຕ້ແສງສະຫວ່າງຂອງມະຕິກອງປະຊຸມໃຫຍ່ ຄັ້ງທີ IXຂອງພັກປະຊາຊົນປະຕິວັດລາວ ບົນພື້ນຖານຂອງສະພາບການສາກົນ ແລະ ພາກພື້ນ ມີການຜັນແປຢ່າງໄວວາ, ມີທັງສິ່ງສະດວກ, ສິ່ງຫຍຸ້ງຍາກ, ມີທັງການຮ່ວມມື ແລະ ການຕໍ່ສູ້ ແລະ ມີຫຼາຍຢ່າງບໍ່ສາມາດຄາດຄະເນລ່ວງໜ້າໄດ້ນັ້ນ, ການເຄື່ອນໄຫວວຽກງານຕ່າງປະເທດ ຂອງ ສປປລາວ ບັນລຸໄດ້ຫມາກຜົນຫລາຍດ້ານ ຕາມແຜນການທີ່ວາງໄວ້.
ໃນດ້ານລະອຽດ, ການຜັນຂະຫຍາຍແມ່ນການປະຕິບັດຕາມຈິດໃຈຂອງກອງປະຊຸມວຽກງານການຕ່າງປະເທດ ຄັ້ງທີ 11 ແລະ 12, ໂດຍຢຶດໝັ້ນໃນແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ ແລະ ປະຕິບັດນະໂຍບາຍເປີດກວ້າງການພົວພັນຮ່ວມມື ແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ກັບບັນດາປະເທດໃນໂລກ ໂດຍບໍ່ໄດ້ຈຳແນກລະບອບການເມືອງ. ການເຄື່ອນໄຫວວຽກງານການຕ່າງປະເທດໃນຂອບສອງຝ່າຍ ແລະ ຫຼາຍຝ່າຍ ແມ່ນມີລັກສະນະຕັ້ງໜ້າ, ເປັນເຈົ້າການ ແລະ ຄ່ອງແຄ້ວນິ້ມນວນ ເຊິ່ງສາມາດຍາດຜົນສຳເລັດມາໄດ້ຫຼາຍດ້ານທີ່ໜ້າເພິ່ງພໍໃຈ, ອັນໄດ້ເຮັດໃຫ້ທ່າອ່ຽງ ແລະ ກຳລັງແຮງສັງລວມຂອງຊາດນັບມື້ນັບເພີ່ມຂຶ້ນ, ການເມືອງມີຄວາມສະຖຽນລະພາບ, ສັງຄົມມີຄວາມສະຫົງບ ແລະ ເປັນລະບຽບຮຽບຮ້ອຍ, ສ້າງເງື່ອນໄຂ ແລະ ປະກອບສວ່ນໃຫ້ແກ່ການພັດທະນາເສດຖະກິດ-ສັງຄົມ ມີການຂະຫຍາຍຕົວຢ່າງຕໍ່ເນື່ອງ ໃນຈັງຫວະຫມັ້ນທ່ຽງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນເປັນກ້າວໆ ເຮັດໃຫ້ຖານະບົດບາດຂອງ ສປປ ລາວ ພົ້ນເດັ່ນຂຶ້ນໃນເວທີພາກພື້ນ ແລະ ສາກົນ.
ການພົວພັນຮ່ວມມືກັບບັນດາປະເທດເພື່ອນມິດຍຸດທະສາດໄດ້ກ້າວເຂົ້າສູ່ລວງເລິກ ແລະ ມີຄຸນນະພາບໃໝ່ ໂດຍສະເພາະແມ່ນການພົວພັນທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຍຸດທະສາດ ແລະ ຍາວນານກັບ ສສ. ຫວຽດນາມ; ການພົວພັນຄູ່ຮ່ວມມືຍຸດທະສາດ ຕາມທິດ 4 ດີກັບ ສປ ຈີນ ແມ່ນໄດ້ມີປະສິດທິຜົນສູງ ແລະ ນຳເອົາຜົນປະໂຫຍດຕົວຈິງມາສູ່ປະເທດຊາດ; ການພົວພັນຮ່ວມມືກັບ ສະຫະພັນ ຣັດເຊັຽ ກໍຄືບັນດາປະເທດສັງຄົມນິຍົມ ສປປ ເກົາຫຼີ ແລະ ສ. ກູບາ ກໍ່ໄດ້ຮັບການຂະຫຍາຍຕົວຂຶ້ນ; ການພົວພັນຮ່ວມມືກັບບັນດາປະເທດເພື່ອນບ້ານ ແລະ ບັນດາປະເທດສະມາຊິກອາຊຽນ ສືບຕໍ່ມີບາດກ້າວຂະຫຍາຍຕົວທີ່ໜັກແໜ້ນ ສາມາດເສີມຂະຫຍາຍໄດ້ການພົວພັນທີດີ ທີ່ນັບມື້ນັບແຕກດອກອອກຜົນ, ສ້າງເງື່ອນໄຂໃນການເຂົ້າປະຊາຄົມອາຊຽນຂອງ ສປປລາວ ກໍຄືການສ້າງພື້ນຖານ ໃຫ້ແກ່ການເຊື່ອມຈອດ, ການເຊື່ອມໂຍງກັບບັນດາປະເທດໃນພາກພື້ນ ແລະໃນໂລກ. ພ້ອມດຽວກັນນັ້ນ, ການພົວພັນຮ່ວມມືກັບບັນດາປະເທດເພື່ອນມິດສາກົນ ກໍຄືບັນດາອົງການຈັດຕັ້ງສາກົນ ໄດ້ຮັບການປັບປຸງດີຂຶ້ນ ແລະ ເປີດກວ້າງອອກເທື່ອລະກ້າວ. ມາຮອດປັດຈຸບັນ ສປປ ລາວ ໄດ້ສ້າງສາຍພົວພັນການທູດ ກັບ 138 ປະເທດ ( ປີ 2011 ມີ 131 ປະເທດ ), ມີສໍານັກງານຕາງໜ້າການທູດຢູ່ຕ່າງປະເທດ 36 ແຫ່ງ; ໃນນັ້ນ ມີສະຖານເອກອັກຄະລັດຖະທູດ 27 ແຫ່ງ, ສໍານັກງານຜູ້ຕາງໜ້າຖາວອນ 3 ແຫ່ງ, ສະຖານກົງສູນໃຫຍ່ 8 ແຫ່ງ, ຫອ້ງການກົງສູນ 1 ແຫ່ງ ແລະ ກົງສູນກິດຕິມະສັກຂອງ ສປປ ລາວ ຈຳນວນ 15 ປະເທດ. ຍົກລະດັບດ່ານໃຫ້ເປັນດ່ານສາກົນ ຈຳນວນ 4 ດ່ານ; ໄດ້ສຳເລັດການປັກຫຼັກໝາຍຊາຍແດນກັບ 3 ປະເທດ ຄື: ສສ. ຫວຽດນາມ, ສປ ຈີນ ແລະ ສສ. ມຽນມາ, ປັດຈຸບັນ ດຳເນີນການສຳຫຼວດ ແລະ ປັກຫຼັກໝາຍຊາຍແດນ ຮ່ວມກັບ ຣາຊະອານາຈັກໄທ ແລະ ຣາຊະອານາຈັກ ກຳປູເຈຍ; ໄດ້ຈັດຕັ້ງປະຕິບັດນະໂຍບາຍຍົກເວັ້ນວີຊາ ສຳລັບຜູ້ຖືໜັງສືຜ່ານແດນທຳມະດາ ກັບ 14 ປະເທດ, ຍົກເວັ້ນວີຊາ ຝ່າຍດຽວ ກັບ 5 ປະເທດ ແລະ ເຊັນສັນຍາຍົກເວັ້ນວີຊາສອງຝ່າຍສຳລັບຜູ້ຖືໜັງສືຜ່ານແດນການທູດ ແລະ ລັດຖະການ ກັບ 34 ປະເທດ, ປະຕິບັດນະໂຍບາຍຍົກເວັ້ນຄ່າທະນຽມວີຊາ ໃຫ້ແກ່ຄົນເຊື້ອຊາດລາວ ທີ່ ຕ່າງປະເທດ ແລະ ອື່ນໆ. ພ້ອມກັນນັ້ນ ກໍໄດ້ເພີ່ມທະວີການພົວພັນດ້ານພັກ ກັບບັນດາພັກກອມມູນິດ, ກຳມະກອນ ແລະ ພັກກຳອຳນາດອື່ນໆ ຈຳນວນ 124 ພັກການເມືອງຂອງປະເທດຕ່າງໆໃນໂລກ.
ຄຽງຄູ່ກັບການເຄື່ອນໄຫວການທູດສອງຝ່າຍ, ຄະນະພັກກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ໄດ້ເອົາໃຈໃສ່ຊີ້ນຳນຳພາເຄື່ອນໄຫວຢ່າງເປັນເຈົ້າການ ໃນເວທີການທູດຫຼາຍຝ່າຍເຊັ່ນ ຂອບການຮ່ວມມືຂອງອາຊຽນ, ໃນເວທີສະຫະປະຊາຊາດ, ຂະບວນການບໍ່ຮ່ວມກຸ່ມ; ກຸ່ມປະເທດກຳລັງພັດທະນາ; ກຸ່ມປະເທດກຳລັງພັດທະນາທີ່ບໍ່ມີຊາຍແດນຕິດກັບທະເລ; ອົງການບັນດາປະເທດທີ່ໃຊ້ພາສາຝຣັ່ງ ແລະ ການພົວພັນຮ່ວມມືກັບບັນດາສະຖາບັນການເງິນສາກົນ; ພອ້ມດຽວກັນ ກໍຍັງໄດ້ເຂົ້າຮ່ວມຢ່າງຫ້າວຫັນໃນຂອບການຮ່ວມມືລະດັບພາກພື້ນ ແລະ ອານຸພາກພື້ນ ໂດຍສະເພາະ ໃນອານຸພາກພື້ນແມ່ນ້ຳຂອງ ອັນໄດ້ນຳຜົນປະໂຫຍດຫຼາຍດ້ານມາສູ່ປະເທດເຮົາ. ຄະນະພັກ ກະຊວງການຕ່າງປະເທດ ແລະ ຄະນະພົວພັນຕ່າງປະເທດ ສູນກາງພັກ ໃດ້ຖືສຳຄັນໃນການເຄື່ອນໄຫວວຽກງານອາຊຽນ ໂດຍສະເພາະການກະກຽມເຂົ້າເປັນປະຊາຄົມເສດຖະກິດອາຊຽນໃນທ້າຍປີ 2015 ດ້ວຍການສ້າງວິໄສທັດປະຊາຄົມອາຊຽນຫຼັງປີ 2015 ແລະ ການກະກຽມເປັນປະທານໜູນວຽນອາຊຽນຂອງ ສປປລາວ ໃນປີ 2016.
ໃນຊຸ່ມປີຜ່ານມາ, ການເຄື່ອນໄຫວການຕ່າງປະເທດຂອງ ສປປ ລາວ ແມ່ນນັບມື້ນັບຂະຫຍາຍຕົວ ໃນທາງກ້ວາງ ແລະ ທາງເລິກ, ເຊິ່ງໄດ້ສະແດງອອກໃນການແລກປ່ຽນຢ້ຽມຢາມ ເຊິ່ງກັນ ແລະ ກັນ ຂອງ ສປປ ລາວ ກັບບັນດາປະເທດຕ່າງໆ ໃນລະດັບປະມຸກລັດ, ຫົວໜ້າລັດຖະບານ, ເຈົ້າກະຊວງ ແລະ ຂະແໜງການຕ່າງໆ. ນອກຈາກນັ້ນ, ສປປ ລາວ ເຮົາຍັງໄດ້ຮັບກຽດເປັນເຈົ້າພາບຈັດກອງປະຊຸມລະດັບສາກົນຕ່າງໆທີ່ສຳຄັນ ເຊັ່ນ: ກອງປະຊຸມລັດຖະສະພາ ອາຊີ-ເອີຣົບ ຄັ້ງທີ 7, ກອງປະຊຸມສຸດຍອດ ອາເຊັມ ຄັ້ງທີ 9, ກອງປະຊຸມໂຕະມົນກັບຄູ່ຮ່ວມພັດທະນາສາກົນ ຄັ້ງທີ 11, ກອງປະຊຸມສຸດຍອດ ການຮ່ວມມືດ້ານເສດຖະກິດ ຂົງເຂດແມ່ນໍ້າ ອີຣາວາດີ, ເຈົ້າພະຍາ, ນໍ້າຂອງ (ACMECs)ຄັ້ງທີ 5, ກອງປະຊຸມສຸດຍອດຜູ້ນຳ ກຳປູເຈັຽ, ລາວ, ມຽນມາ ແລະ ຫວຽດນາມ(CLMV) ຄັ້ງທີ 6, ກອງປະຊຸມສຸດຍອດ ສາມຫລ່ຽມພັດທະນາ ກຳປູເຈັຽ, ລາວ ແລະ ຫວຽດນາມ (CLV DTA)ຄັ້ງທີ 8 ແລະ ກອງປະຊຸມລັດຖະສະພາອາຊຽນຄັ້ງທີ 35 (IPA)ແລະ ກອງປະຊຸມທີ່ສຳຄັນອື່ນໆອີກ.
ຜ່ານການເຄື່ອນໄຫວຕ່າງປະເທດໃນໄລຍະ 5 ປີ ຜ່ານມາ, ເຮັດໃຫ້ບົດບາດຂອງ ສປປ ລາວ ເຮົາພົ້ນເດັ່ນຂຶ້ນຢູ່ໃນເວທີພາກພື້ນ ແລະ ສາກົນ, ເຮັດໃຫ້ພວກເຮົາສາມາດຂົນຂວາຍຍາດແຍ່ງການຊ່ວຍເຫຼືອຈາກຕ່າງປະເທດ ນັບມື້ນັບເພີ່ມຂຶ້ນ, ເຊິ່ງໃນໄລຍະສົກປີ 2013-2014 ລາວເຮົາໄດ້ຮັບການຊ່ວຍເຫຼືອທາງດ້ານການພັດທະນາ (ODA) ເຖີງ795,18 ລ້ານໂດລາ ສະຫະລັດ, ເຊິ່ງການຊ່ວຍເຫຼືອດັ່ງກ່າວເປັນການປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ກໍຄືການບັນລຸເປົ້າໝາຍສະຫັດສະຫວັດດ້ານການພັດທະນາ ໃນປີ 2015 ແລະ ການນຳພາປະເທດຊາດໃຫ້ຫຼຸດພົ້ນອອກຈາກຄວາມດ້ອຍພັດທະນາ ໃນປີ 2020.
ຍ້ອນການເຕີບໃຫຍ່ຂະຫຍາຍຕົວຂອງຂະແໜງການຕ່າງປະເທດຂອງພວກເຮົາໃນເງື່ອນໄຂທີ່ ສປປ ລາວ ເຮົາພວມມີການເຊື່ອມໂຍງກັບພາກພື້ນ ແລະ ສາກົນຢ່າງກວ້າງຂວາງ ແລະ ເລິກເຊິ່ງ, ໃນວັນທີ 20 ກໍລະກົດ 2015,ໄດ້ມີການແຍກອົງຄະນະພັກກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ເພື່ອເຮັດໃຫ້ການເຄື່ອນໄຫວວຽກງານການຕ່າງປະເທດໃນໄລຍະໃໝ່ແທດເຖີງທາງລວງກວ້າງ ແລະ ລວງເລິກ, ເປັນເຈົ້າການລະອຽດຂື້ນຕື່ມເພື່ອຮັບປະກັນໃຫ້ແກ່ໝາກຜົນສູງສຸດຂອງສປປລາວ ໃນພາກພື້ນ ແລະ ສາກົນ ພອ້ມກັບການເປີດທາງໃຫ້ກວ້າງ, ເລິກເຊິ່ງ ແລະ ອຸດົມສົມບູນ ໃນການຮ່ວມມືດ້ານການເມືອງ, ເສດຖະກິດ ແລະ ສັງຄົມກັບບັນດາປະເທດ.
ຜົນສໍາເລັດຂອງການເຄື່ອນໄຫວວຽກງານການຕ່າງປະເທດທີ່ກ້າວມາຂ້າງເທິງນັ້ນ ແມ່ນໄດ້ປະກອບສ່ວນອັນສຳຄັນເຂົ້າໃນການສ້າງສະພາບແວດລ້ອມພາຍນອກ ທີ່ເອື້ອອຳນວຍ ໃຫ້ແກ່ການພັດທະນາເສດຖະກິດ-ສັງຄົມ, ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ, ເຊື່ອມໂຍງເຂົ້າກັບສາກົນເທື່ອລະກ້າວຢ່າງໜັກແໜ້ນ,ໄດ້ຮັບຄວາມໄວເນື້ອເຊື່ອໃຈ ແລະ ສະໜັບສະໜູນຈາກເພື່ອມິດສາກົນ ຢ່າງກວ້າງຂວາງ, ບົດບາດອິດທິພົນຂອງພັກ ແລະ ກຽດຊື່ສຽງຂອງ ສປປ ລາວ ໄດ້ຮັບການເຊີດຊູສູງເດັ່ນຂຶ້ນໃນເວທີພາກພື້ນ ແລະ ສາກົນຢ່າງຕໍ່ເນື່ອງ.
ມາຮອດປະຈຸບັນ, ຫນ້າທີ່ໃນການປະກອບສວ່ນການເຄື່ອນໄຫວການຕ່າງປະເທດ ຍິ່ງແມ່ນຫນ້າທີ່ຂອງທົ່ວພັກ, ທົ່ວກອງທັບ ແລະ ທົ່ວປວງຊົນ ທີ່ພອ້ມກັນເຄື່ອນໄຫວຕາມແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເຫມີປາຍ ແລະ ປະຕິບັດນະໂຍບາຍເປີດກວ້າງການພົວພັນຮ່ວມມື ແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ໃຫ້ນັບມື້ນັບອຸດົມສົມບູນ ແລະ ຮັບປະກັນຜົນປະໂຫຍດອັນສູງສຸດ ຂອງ ສປປລາວ ໃນພາກພື້ນ ແລະ ສາກົນ.
ໃນກອງປະຊຸມໃຫຍ່ຄັ້ງທີ III ຂອງອົງຄະນະພັກກະຊວງການຕ່າງປະເທດ ທີ່ຈະມາເຖີງອັນໄກ້ນີ້ ຈະໄດ້ມີການຮັບຮອງເອົາມະຕິຂອງກອງປະຊຸມ ເຊິ່ງເປັນເຫມືອນແຜນແມ່ບົດ ປູທາງໃຫ້ແກ່ການເສີມຂະຫຍາຍ ແລະ ເປີດກວ້າງ ການເຄື່ອນໄຫວວຽກງານການຕ່າງປະເທດ ໃນໄລຍະໃຫມ່ ເຊິ່ງເປັນໄລຍະແຫ່ງການເລັ່ງລັດການຮວ່ມມື ທັງໃນສອງຝ່າຍ ແລະ ຫລາຍຝ່າຍ, ການເຊື່ອມຈອດ ຮວມທັງການເຊື່ອມໂຍງກັບບັນດາພາກພື້ນ ແລະ ສາກົນຕ່າງໆ.